Бір жылда 200 млн теңге қаржы жымқырған: Ақтөбеде мектептің бас есепшісіне қатысты үкім шықты

Ақтөбе қаласының № 2 соты шаһардағы №55 мектеп-гимназиясының бас бухгалтеріне қатысты үкім шығарды. Бұл туралы Антикордың баспасөз қызметі мәлімдеді, деп хабарлайды Orda.kz порталы.

Сот процесі ашық режимде жүргізілді.

Сот процесіне онлайн режимде білім басқармасы мен бөлімдерінің қызметкерлері, оның ішінде Ақтөбе облысының 403 қалалық және аудандық мектеп директорлары, есепшілері, педагогикалық құрамы қатысты.

Ақтөбе қалалық мектебінің бас бухгалтері аса ірі мөлшерде бюджет қаражатын жымқырғаны үшін сотталды. Ол 8 жыл бойы өзінің банктік шотына жалақы ретінде заңсыз аударымдар жасаған, нәтижесінде мемлекеттен 413,8 млн теңге жымқырды.

Тек бір жылдың ішінде ол өзіне 200 млн теңгеден астам қаражат аударған, бұл бүкіл мектептің жылдық еңбекақы қорының 30% -ын құрайды.

Сот үкімімен оған 7 жыл бас бостандығынан айыру жазасы тағайындалды, сондай-ақ 10 жыл мерзімге материалдық жауапты лауазымдарды атқару құқығынан айырылды.