«Бір үйдің 5 адамы»: ата-анасы мен бауырларынан айырылған ер адамға сот үкімі шықты

Ақтөбеде жол апаты кезінде бір отбасының бес адамы қаза тапқан қайғылы оқиғаға қатысты сот үкімі шықты, деп хабарлайды Orda.kz. 

Ақтөбе облысының қылмыстық істер жөніндегі мамандандырылған ауданаралық сотында жол апатына қатысты іс қаралып, үкім оқылды.  Қайғылы оқиға осы жылдың 26 тамызында болған.

Ақтөбе облысы Ойыл ауданының 28 жастағы тұрғыны Ілияс Қыдыров Хромтау аудандық полиция бөлімінде жұмыс істеген. Үйленбеген. Бұрын сотталмаған. Ол Қылмыстық кодекстің 345-бабы 4-бөлігімен кінәлі деп талынып, 5 жылға бас бостандығынан айырылды.

Ол туыстары мінген көлікті тізгіндеген. Оған Қылмыстық кодекстің 345-бабы 4-бөлігінде «Көлік құралын басқаратын адамның жол ережесі қағидаларын бұзу, абайсызда екі немесе одан да көп адамның өліміне әкеп соққан іс-әрекет» бабымен айып тағылды. Сотталушы сөзінде бас бостандығынан айыру жазасын қолданбауды сұраған еді. 

Оның қорғаушысы да айыпталушы мен жәбірленуші тараптың жақын адамдар екенін алға тартты. 

Сотталушының жақындары сот үкіміне апелляциялық шағым түсіретінін, бас бостандығынан айырмауды сұрайтындарын мәлімдеді.