«Бір көзі көрмей қалды»: БҚО-да абайсызда оқушыға оқ атқан адам сотталды

Батыс Қазақстан облысы Ақжайық аудандық соты мектеп оқушысының аңшылық кезінде қарудан жарақат алу ісін қарады. Айыптыға сот 5 млн өтемақы төлеуді міндеттеп, өзін қатаң режимдегі колонияға 6 айға жіберді, деп хабарлайды Orda.kz.

Өңірдегі «Менің қалам» порталының мәліметіне сүйенсек, 2024 жылғы 3 ақпанда 16 жасар Нұрмұхан Шайхісләм анасының рұқсатымен Шапай ауылынан ағасы және көршілерімен бірге орманға шыққан. Жабайы аңды қуып жүрген кезде, оқушыға ИЖ-43 қаруынан атылған оқ тиген.

Оқыс оқиға нәтижесінде Нұрмұхан бірнеше ота жасатып, оң көзінен айырылды. Оның денесінде  металдан жасалған оқ жарықшақтарының ізі қалды.

Сот алдында зардап шеккен оқушының 30 жастағы көршісі Владимир Липатов тұр. Ол ҚР ҚК 114-бабының 3-бөлімі бойынша «абайсызда денсаулыққа зиян келтіру» бабымен айыпталды. Липатов өзінің кінәсін мойындамайтынын, тек қоянға атқанын және оқушыға тиген-тимегенін білмейтінін айтты.

18 қыркүйекте сот Владимир Липатовты кінәлі деп танып, алты айға бас бостандығынан айыру жазасын тағайындады, жазаны қатаң режимдегі мекемеде өтеуі тиіс. Сонымен қатар, ол 2 289 407 теңге материалдық және 5 миллион теңге моральдық зиянды өтейді.

Сот үкімі заңды күшіне енген жоқ және апелляциялық шағым беруге жатады.