Бір емес екі оқ тиген Руслан Берденовке шабуылға дейін қоқан-лоққы көрсеткен

Шымкент қаласы әкімінің орынбасары Руслан Берденовке жасалған қарулы шабуылға дейін оған қоқан-лоққы көрсетілген, деп хабарлайды Orda.kz. 

Respublica партиясының тең төрағасы, кәсіпкер Бейбіт Әлібековтың айтуынша, оқиға Шымкенттегі құрылыс саласындағы тәртіп орнату әрекетімен байланысты болуы мүмкін.

«Менің ойымша, бұл шабуыл құрылыс саласындағы тәртіп орнатуға қатысты. Бұны букмекерлік кеңселермен байланыстыру қисынсыз көрінеді. Бүгін ғана осы тақырыпта өткір жиналыс өтті. Маған Русланға бұған дейін қоқан-лоққы жасалғаны айтылды» деп жазды Әлібеков.

Сонымен қатар, түрлі ақпарат көздеріне сүйенсек, «Сайга-12» аңшы мылтығымен бес рет оқ атқан күдікті бұл әрекетін жеке реніші ретінде түсіндірген. Бейресми деректерге қарағанда, ол шенеунікті  әйелімен әдепсіз қарым-қатынас жасады деп есептеген.

Еске салсақ, Шымкентте қаласы әкімінің орынбасары Руслан Берденовке қарулы шабуыл жасалды. Оқиға 21 сәуір күні кешкі сағат 20:30 шамасында қалалық әкімдік ғимаратының жанында болған. Шенеунік бірнеше жерінен жараланып, жедел түрде ауруханаға жеткізілді. Қазір ол операция үстінде жатыр.