«Бір аптада төртінші мәйіт»: Атырауда тағы екі бала суға батып кетті

Қала іргесіндегі Бесікті ауылында кәмелетке толмаған екі бала Жайық өзеніне батып кетті.

14 жастағы жасөспірімнің бірінің денесін туыстары судан шығарып, екіншісін іздестіруде. Бейресми деректерге қарағанда, олардың бірі суға бата бастаған, екіншісі оны құтқармақ болып жардан секіргенде суға батып кеткен.

«Іздестіру жұмыстары жалғасуда»,- деп хабарлайды Атырау облысы Төтенше жағдайлар департаменті.

Естеріңізге сала кетейік, осыдан үш күн бұрын Атырауда Жайық өзенінде екі бала суға батып кеткен болатын. 2010 жылы туылған жасөспірімдердің бірінің денесі 4,5 метр тереңдіктен табылып, 19:30-да төтенше жағдайлар қызметінің құтқарушылары шығарған. Екінші жасөспірімнің денесі екі күннен кейін табылды.