Бір аптада Кабулдан 25 мың ауған эвакуацияланды

Соңғы бір аптада Талибандар Ауғанстан билігіне келгелі бейбіт халық үйлерін тастап, АҚШ бақылауында қалған жалғыз нысан Кабул әуежайына бет алған.

Бұл туралы Orda.kz хабарлады.

Әуежайға кірер аймақта адамдар лық толып, салдарынан 20 жуық адам қайтыс болған. Адамдар АҚШ пен оның одақтастарының әскери күштері өз елдерінің азаматтарын және олармен ынтымақтас, әріптес болған ауған азаматтарын шұғыл эвакуациялап жатқан сәтті пайдаланып, Ауғанстаннан шығып кетпекші болған. Мұндай ақпаратты НАТО өкілі 22 тамыз күні айтты.

Кабул әуежайы АҚШ қарулы күштерінің бақылауында. Ал оған барар жолды Талибандар күзетіп тұр.

Ақпаратқа сүйенсек, әлі де 10 мың адам әуежайға кіруге ниетті. Бірақ АҚШ барлығын бірдей әуежайға кіргізіп жатқан жоқ.

Қазір Кабул әуежайы азаматтық рейстерге 48 сағатқа жабылды.

Әуежайда мерт болған адамдардың біріне оқ тисе, енді бірі аяқ астында тапталып қалған. Британ солдаттары 21 тамыз әуежай маңында 7 адам аяқ астында қалып, тапталып, көз жұмғанын растаған.

Ертең, 24 тамызда Ауғанстаннан адамдарды эвакуациялау мәселесі «Жетілік тобы» елдері басшыларының онлайн саммитінде талқыланады. Мұндай ақпаратпен Ұлыбритания премьер-министрі Борис Джонсон бөлісті.

Айта кетсек, АҚШ әскері 31 тамызда Ауғанстаннан шығып кетуі тиіс.

Жергілікті халық Талибандардың берген уәделеріне сеніп тұрған жоқ. Себебі, олардың айтуынша, елде тәртіпсіздіктер жайлап жатыр.

Қазіргі таңда Ауғанстандағы Кабулдың солтүстігіндегі Панжер шатқалында ғана Талибандар билік орнатпаған.

Еске салсақ, 15 тамызға қараған түні Талибан содырлары үкімет әскерінің бақылауындағы ірі қала Кабулға кірді. Талибандар елорданың үлкен бөлігін бақылауға алып, президент сарайын басып алды.