«Бір адам қаза тапты»: Түркістан облысында мемлекеттік қызметкерлер тұратын үйде жарылыс болды

Түркістан облысының Отырар ауданында газ жарылып, 35 жастағы Әсел Әмірханқызы көз жұмды, деп хабарлайды Orda.kz.

Әйелдің денесінің 90 пайызы күйіп, ол жансақтау бөлімінде бір апта бойы ем қабылдаған.

Марқұм педиатр болып жұмыс істеген. Ол өзі тұрып жатқан үйді екі жыл бұрын мемлекеттік бағдарлама арқылы алған. Артында жұбайы мен екі баласы қалды. Қайғылы оқиға кезінде олардың ешқайсысы үйде болмаған.

Жарылыс 30 қазан күні Отырар ауданындағы көпқабатты үйлердің бірінде болған. Бұл үй мемлекеттік бағдарлама аясында төрт жыл бұрын ғана салынған. Мұнда дәрігерлер, прокурорлар мен судьялар тұрады. Осы уақытқа дейін үйлерге тек ыстық су ғана берілген, ал газ апат болардан бір күн бұрын ғана қосылған екен.

Қазір жарылыстың нақты себебі анықталып жатыр.