«Білім саласындағы жанжал»: Жаңақорғанның білім бөліміне үкім шықты

Қызылорда облысы Жаңақорған аудандық соты білім беру бөлімі бюджетінің 200 миллион теңгеден астам қаражатын жымқыру ісі бойынша үкім шығарды, деп хабарлады Orda.kz.

Сот 9 адамның кінәлі екенін анықтады.

Облыс прокуратурасы жүргізген тергеу барысында қаржының білім беру жүйесіне қатысы жоқ адамдардың есепшотына заңсыз аударылғаны дәлелденді. Қылмыстық істің негізгі фигуранттары бас бостандығынан айырылды, ал 7 сыбайлас шартты түрде жаза алып, бухгалтерлік қызметпен айналысу құқығынан айырылды.

Келтірілген залалдың бір бөлігі өтелгенімен, сот үкімі әлі заңды күшіне енген жоқ. Бұған дейін аудан мектептерінің бухгалтерлері «жалған адамдардың» есепшоттарына заңсыз ақша аудару фактілері анықталып, осы істер бойынша да айыптау үкімдері шыққан болатын.