Білім министрлігі Қазақстанда ресейлік ЖОО филиалдарын ашу бойынша келіссөздер жүргізді

Қазақстанның Білім және ғылым министрлігі мен Ресейдің ғылым және жоғары білім министрлігі жоғары білім саласындағы ынтымақтастық туралы келісті.

ҚР Білім министрлігінің баспасөз қызметінің хабарлауынша, 24 желтоқсанда министр Асхат Аймағамбетов пен ресейлік әріптесі Валерий Фальков телефон арқылы сөйлескен.

Министрлер жоғары білім және ғылым саласындағы ынтымақтастық мәселелерін, сондай-ақ ынтымақтастық туралы жаңа үкіметаралық келісімге қол қоюды талқылады.

Келісімдер аясында 28 желтоқсанда Білім және ғылым вице-министрі Қуаныш Ерғалиев бастаған еліміздің ұлттық университеттерінің ректорларынан құралған қазақстандық делегация Мәскеуге аттанды.

Қазақстандық делегация Ресейдің Ғылым және жоғары білім министрлігінің өкілдерімен, Мәскеу физика-техникалық институтының, «МИФИ» Ұлттық зерттеу ядролық университетінің, Ломоносов атындағы Мәскеу мемлекеттік университетінің басшылығымен кездесті.

«Біз бұл университеттерді аралап, ынтымақтастық және елімізде ресейлік жоғары оқу орындарының филиалдарын ашу туралы келіссөздер жүргіздік. Сондай-ақ, біз қолданыстағы келісімдер мен бірлескен бағдарламалар аясында тығыз ынтымақтастық туралы келістік» деді вице-министр Қуаныш Ерғалиев.

Оның айтуынша, «Болашақ» стипендиаттарының ресейлік жоғары оқу орындарында оқу және тағылымдамадан өту бағытында жұмысты жандандыру бөлек бағыт болмақ.