Білім беру ұйымдарында бетперде режимі алынып тасталды

Қазақстанның мектептері мен жоғары оқу орындарында бетперде режимі алынып тасталды.

Бұл Ковид-19 таралуы бойынша «жасыл» және «сары» аймақтарда орналасқан аймақтарға қатысты.

Білім беру ұйымдарында міндетті маска режимі алынып тасталды. Бұл туралы қаулыға Қазақстан Республикасының бас мемлекеттік санитарлық дәрігері Айжан Есмағамбетова қол қойды.

 «Жасыл» және «сары» аймақтардағы эпидемиологиялық жағдайды бағалау матрицасына сәйкес келетін өңірлерде, барлық меншік нысанындағы және ведомстволық бағынысты білім беру ұйымдарында бетперде кию режимін міндетті түрде сақтау талаптары жойылды. Кабинет  жүйесінде оқуға рұқсат етіледі.

Білім беру ұйымдары әкімшілігінің шешімі бойынша бетперде режимін сақтау ерікті болуы мүмкін екені атап өтілген.

Егер облыс «қызыл» аймаққа көшсе, барлық меншік нысанындағы және ведомстволық бағынысты білім беру ұйымдарында бетперде режимі қайтадан міндетті болып, зертханалық және практикалық сабақтарды қоспағанда, аудиториялық оқыту жүйесі жойылады.

Қаулы қол қойылған күнінен бастап күшіне енеді.