Билікшіл бес партия қатысатын парламент сайлауы басталды

Бүгін, 10 қаңтар күні таңғы сағат 7-де Қазақстанда кезекті рет мәжіліс пен мәслихат сайлауы басталды.

Дауыс беру кешкі сағат 8-де аяқталады.

Орталық сайлау комиссиясының мәліметінше, елде барлығы 10 мыңнан астам сайлау учаскесі құрылған. Сайлаушы саны - 11,8 млн.

Бұл сайлауға елде ресми тіркелген алты партияның бесеуі қатысып жатыр. Олар: «Нұр Отан», «Ақ жол», «Адал», «Ауыл» және «Қазақстан халық партиясы». Ал ЖСДП партиясы сайлауға бойкот жариялаған.

Саяси додаға қатысып жатқан бес партия мәжіліс сайлауына барлығы 312 кандидат ұсынған. Кандидаттардың басым бөлігі биліктегі «Нұр-Отан» партиясы мен қазіргі парламентте отырған «Қазақстан халық партиясының» өкілдері.

Сайлауға түсіп жатқан саяси ұйымдардың арасында оппозициялық партия жоқ.