Билік ақыры журналист Жәния Ұранқаеваны үкімет ғимаратына кіргізетін болды

Бүгін үкімет ғимаратына журналист Жәния Ұранқаеваның кіруіне рұқсат берілді деп хабарлайды Orda.kz.

Еске сала кетсек, Orda.kz бұл мәселе жайлы жазған болатын.

«Әділ сөз» қоры үкімет аппаратына жасаған өтінішінен кейін, Үкіметтің баспасөз қызметі уақытша шектеулерді қайта қарап, Ұранқаеваға 2024 жылдың 31 желтоқсанына дейін өз қызметін толық орындауға мүмкіндік берді.

Журналист барлық өткізу тәртібін және нысан ішінде сақталуға тиісті ережелерді орындауы тиіс.

Еске сала кетсек, 10 қыркүйекте үкімет өткізген брифингте осы мәселені көтеріп тілшілер сұрақ қойған болатын.

Жәния Ұранқаева өзін қолдаған әріптестеріне разылығын білдірді.

«Бүгін (10 қыркүйек) менің үкімет отырысына қатыса алмаған алғашқы күнім болды. 6 қыркүйектен бастап мені ол жерге кіргізбейді. Дегенмен менімен иық тірестіріп қызметтес болып жүрген әріптестерім маған қолдау білдірді. Олар мені қолдап, қорғап, осы қиын сәтте арқа сүйеріме айналды және мен оларға ризамын», — деді Жәния Ұранқаева. 

Сондай-ақ «Әділ сөз» қорының басшысы Қарлығаш Жаманқұлова пікір білдірді.

«Алдағы күндері Үкімет аккредитация ережелерін  ашық түрде талқылауға мүмкіндік береді. Бар жағдайдың егжей-тегжейін айта алмасам да, журналистер қауымының ұстанымдары ескеріледі деген нақты үміт бар екенін айтқым келеді. Келіссөздер барысында осы шешімге келген Үкімет аппаратының кәсіби ұстанымына шын жүректен алғысымды білдіремін», — деді «Әділ сөз» қорының басшысы Қарлығаш Жаманқұлова.