Бидай әкелу тыйымы тағы жарты жылға ұзартылды - Сауда министрлігі

Тағы жарты жыл бойы Қазақстан аумағына автокөлікпен, оның ішінде ЕАЭО-ға мүше мемлекеттерден бидай әкелуге тыйым салынды, деп хабарлайды Orda.kz ҚР Сауда министрлігі баспасөз қызметіне сілтеме жасап.

Шешім сыртқы сауда саясаты және халықаралық экономикалық ұйымдарға (ХЭҰ) қатысу жөніндегі ведомствоаралық комиссия отырысында айтылды. Бұған дейін дәл осындай тыйым 10 сәуірде қабылданған болатын. Оның мерзімі 10 қазанда аяқталады.

«Тыйымды ұзарту туралы шешім Қазақстан Республикасына бидай импортының және оны Ресей Федерациясының шекаралас облыстарынан автомобиль көлігімен кері экспорттаудың «заңсыз жолдарын» алып тастау мақсатында қабылданды. Сонымен бірге,  отандық ауыл шаруашылығы тауарын өндірушілерді тұқымдық материалмен қамтамасыз ету үшін тұқымды автомобиль көлігімен жеткізуге рұқсат етіледі. Бұл жағдайда  тұқым сапасының сертификаты болуы тиіс», - деп түсіндірді Сауда министрлігі. 

Сонымен қатар, Қазақстан аумағына әкелінетін бидай импорты да теміржол арқылы шектелген. Тек лицензиясы бар элеваторларға, астық өңдеушілерге және құс шаруашылығы кәсіпорындарына ғана жеткізуге болады.