Бет-жүзді жасыратын қара киім кигенше, ұлттық киім киген дұрыс — Тоқаев

Бурабай баурайында өткен Ұлттық құрылтайдың төртінші отырысында ел президенті Қасым-Жомарт Тоқаев дінге қатысты жүгенсіздік пен тәртіпсіздікке жол бермеу керектігін айтты, деп хабарлайды Orda.kz.

Тоқаевтың айтуынша, еліміздегі діни ахуал мәз емес. Олар теріс ағымдар мен жат идеологияларға тосқауыл қою қажет екенін жеткізді.

«Мәжіліс депутаты Ермұрат Бапи еліміздегі діни ахуалға алаңдаушылық білдіріп жүр. Құрылтай мүшелері Дания Қыдырбаева және Олжас Сүлеймен жат діни ағымдардың жастар арасында, әсіресе спорт саласында ықпалы күшейіп бара жатқанын айтты. Елімізде дін бостандығына кепілдік берілген. Бірақ жүгенсіздік пен тәртіпсіздікке жол беруге болмайды. Діннің басты міндеті – ұлтты ұйыстыру. Діни ұйымдардың қызметін реттейтін құжаттар осы талаптарға сай болуы керек. Бұл мәселені жан-жақты қарастыру қажет. Соның ішінде заңнаманы жаңа жағдайға бейімдеу маңызды», – деді Тоқаев.  

Сонымен қатар, Тоқаев ұлттық киім киюге қатысты да пікірін білдірді.

«Қоғамда ұлттық киімге деген қызығушылық артып келеді. Оны мектептерде, түрлі мекемелерде, соның ішінде ірі компанияларда да кие бастады. Сұраныстың артуы тігін цехтарының ашылуына, жаңа брендтер мен дүкендердің пайда болуына ықпал етті. Осылайша, ұлттық киім кию біртіндеп күнделікті қалыпты жағдайға айналуда. Бұл – өте жақсы үрдіс. Бет-жүзді жасыратын қара киім кигеннен гөрі, ұлттық стильдегі киім киген әлдеқайда дұрыс. Біздің ұлттық киіміміз этникалық ерекшелігімізді айқын көрсетеді, сондықтан оны жан-жақты насихаттау қажет», –  президент.