Бескөл ауылында жедел жәрдем дәрігерлері инсультпен ауыратын науқасты шанамен сүйреуге мәжбүр болды

Жедел жәрдем қызметкерлеріне Солтүстік Қазақстан облысы Бескөл ауылындағы 56 жастағы тұрғынның сол жақ аяқ-қолы ұйып, басы айналып жатқандығы туралы хабар түсті. Науқастан инсульт белгілері байқалды, деп хабарлайды Orda.kz порталы. 

Науқасқа көлікті тастап, жаяу жеткен жедел жәрдем қызметкерлері оны шанамен сүйреуге мәжбүр болды. Себебі қардың қалыңдығынан жедел жәрдем көлігі қозғала алмаған.

«Фельдшерлер Айдар Омаров пен Әмір Шірөжеев тосылып қалмай, бірден науқасты шанамен тасымалдаймыз деген шешімге келді. Көлік жүргізуші Руслан Ақымбаев та атсалысып, науқас уақтылы стационарға жатқызылды» деп хабарлады облыстық жедел медициналық жәрдем орталығы. 

Қуанышқа орай, қазірде науқастың жағдайы тұрақты.