Берік Уәли сотталған адаммен түскен фотосына қатысты түсініктеме берді

Абай облысының әкімі Берік Уәли әлеуметтік желіде тарап кеткен «Әліби ісі» бойынша істі болған Арман Әбілтаевпен түскен суретіне қатысты елге жауап берді, деп хабарлайды Orda.kz.

Берік Уәлидің айтуынша, ол Әбілтаевпен таныс емес. Шенеунік оның өткеніне қатысты мәліметті сурет жарияланғаннан кейін ғана білгенін айтты. 

«Оның бұрын сотталғанын кейінірек білдік әрі біз үшін күтпеген жағдай болды. Құрылысшылармен кездестік, олардың арасында осы кісі де болды. Сол кезде бәрімен бірге суретке түстік. Кейін ол оны Instagram-ға жүктеген. Шынымды айтсам, оның не үшін сотталғанын да білмедім. Мұны өздеріңізден, журналистерден естідім», – деді Уәли. 

Сонымен қатар, кездесудің жеке кездесу болмағанын ерекше атап өтті. 

«Мен күн сайын өте көп адаммен кездесемін, бәрімен суретке түсемін. Мұнда қандай да бір сенсация бар деуге негіз жоқ», – деп қысқа қайырды әкім.

Еске сала кетейік, Арман Әбілтаев елдегі ең резонансты істердің бірі — «Әліби ісі» бойынша сотталған. 2015 жылы ол Әліби Жұмагұловқа ауыр жарақат келтірді деп танылып, 12 жылға бас бостандығынан айырылды. Кейін жаза 8 жылға дейін қысқартылды, ал 2018 жылы Әбілтаевтың жазасы айыппұлға ауыстырылғаннан кейін, көлемі бір миллион теңгеден асатын айыппұлды төлеп, бостандыққа шықты.