Берік Уәли қайтадан Тоқаевтың баспасөз хатшысы болып тағайындалды

Мемлекет басшысының Өкімімен Берік Уәли президент Қасым-Жомарт Тоқаевтың баспасөз хатшысы болып тағайындалды.

Бұл туралы Ақорда хабарлайды.

Мемлекет басшысының өкіміне сәйкес, Нұрмұхамед Байғараев өз өтініші бойынша Қазақстан Республикасы президентінің баспасөз хатшысы қызметінен босатылды.

Нұрмұхамед Байғараевтың орнына Берік Уәли Қазақстан Республикасы президентінің кеңесшісі және баспасөз хатшысы болып тағайындалды.

2019-2022 жылдары Берік Уәли президенттің баспасөз хатшысы қызметін атқарған. Қазіргі тағайындауға дейін «Хабар» Агенттігі» АҚ басқарма төрағасы (2022 жылдың наурызынан бастап) болды.

Президенттің бұрынғы баспасөз хатшысы Нұрмұхамед Байғараев бұл қызметте небәрі алты күн болды. 6 қыркүйекте ол ресми түрде тағайындалды, ал 11 қыркүйекте ол денсаулығына байланысты осы лауазымдағы кәсіби міндеттерін атқара алмайтынын мәлімдеді.