Берік Асылов Самат Әбіштің неге қамауға алынбағанын айтты

Бас прокурор Берік Асылов қанды қаңтардан кейін ҰҚК барлық басшылары қамауға алынғанымен, не себепті елбасының немере інісі Самат Әбіш әлі ұсталмағанын айтты.

Журналистер бүгін Асыловқа неге Кәрім Мәсімов пен оның үш орынбасары жауапқа тартылған кезде оның орынбасары Самат Әбіш қамалмағанын сұрады.

«Қазіргі кезде Самат Әбішке қатысты ешқандай дәлел жоқ. Кәрім Мәсімов қамауға алынды. Оған Қылмыстық кодекстің сан алуан бабы бойынша айып тағылып отыр» деді Асылов.

Еске салсақ, қасіретті қаңтардан кейін елбасының немере інісі Самат Әбіш ұсталғаны белгілі болған. Алайда оны Ұлттық қауіпсіздік комитеті жоққа шығарды. 13 қаңтар Самат Әбіштің еңбек демалысына шыққаны белгілі болды. Ал 17 қаңтар күні ол қызметінен босатылған.