Бергей Рысқалиев Қазақстанға оралуға дайын екенін айтты

Атырау облысының бұрынғы әкімі Бергей Рысқалиев оған қатысты сот үкімі қайта қаралса, Қазақстанға оралу мүмкіндігін жоққа шығармады.

Бұл туралы ол Сontur.kz сайтына берген сұхбатында хабарлады.

Бұл ретте Бергей Рысқалиев «қаражаттың шығу тегін» тексеруден қорықпайтынын айтты.

 – Біз барлық сот істерін жеңіп, қорларымыздың жемқорлық емес екенін және біздің бизнесіміз қаражат көзі екенін дәлелдедік, – деді ол.

Атырау облысының бұрынғы әкімінің айтуынша, Жоғарғы соттың шешіміне қарамастан, оның мүлкі оған ешқашан қайтарылмаған.

– Негізі бүгінде барлық мүлік тәркіленді және бізге ештеңе қайтарылған жоқ. Жоғарғы сот пен Бас прокуратураның мүлікті босатып алуының себебі – Қазақстандағы заңгерлеріміз үшінші тұлғалардың мүлкін заңсыз басып алу туралы көп жазған соң, Қазақстанда әділ сот бар екенін бүкіл әлемге көрсеткісі келді.

Ұйымдасқан қылмыстық топ болған жоқ. Менің ісімнің саяси астары бар. Ойдан шығарылғаны туралы менің қолымда дәлелдер мен құжаттар жеткілікті. Жаңа үкімет не айтар екен, көрейік. Мен БҰҰ АҚК-не Қазақстанға қарсы шағым түсірдім. Барлық мерзімдер өтіп кетті. Олар әлі күнге дейін, шамамен 1,5 жыл бойы менің ісіме қатысты БҰҰ АҚК-ның хатына да жауап бере алмайды, – деді Рысқалиев.

Еске салсақ, Бергей Рысқалиев 2006-2012 жылдар аралығында Атырау қаласы мен Атырау облысының әкімі қызметін атқарған. 2013 жылы экс-әкімге аса ірі көлемде бюджет қаражатын жымқырды және қылмыстық топ құрды деген айып тағылған болатын.

Тергеу бес жылға созылып, 2019 жылы қазақстандық сот Бергей Рысқалиевті 17 жылға, оның ағасы, мәжілістің экс-депутаты Арманжан Рысқалиевті 16 жылға бас бостандығынан айырды. Екі үкім де сырттай шығарылды.

2020 жылдың жазында қазақстандық сот Бергей Рысқалиевтың отбасы мен жақындарынан тәркіленген мүліктің «бір бөлігін» қайтаруды бұйырды. Рысқалиевтың мүлкін қайтаруға қатысты кассациялық шағымды Қазақстанның Бас прокуратурасы беріп, оны Жоғарғы сот тез арада мақұлдады.