Бентли мен Лада Алматы зообағына орналастырылды

Нұр-Сұлтанда цирк қызметкері айып тұрағында заңсыз ұстаған екі жолбарыс Алматы зообағына әкелінді. Қазір жануарлар хайуанаттар бағының карантиндік аймағында.

Нұр-Сұлтандағы айып тұрағында цирк қызметкері ұстаған екі жолбарыс Алматы зообағына орналастырылды.

Жануарларға Бентли және Лада деген ат берілген. Алматы тұрғындары мен қонақтары оларды 2022 жылы тамашалай алады.

— Жануарларға жағдай жасау үшін олар туралы сот шешімі шықты. Оларды өзіне алып кеткісі келетіндер көп болды: Қарағанды ​​хайуанаттар бағы, Шымкент зообағы. Бірақ соған қарамастан, оларды бізге беруді ұйғарды. Жануарларға карантин жалғасып жатыр. Олар осында. Жалпы  келушілеріміз тамашалау үшін көктемде оларды шығаруды көздеп отырмыз, - дейді хайуанаттар бағының директоры Сейілхан Әкілбеков.

Жолбарыстар үшін арнайы қоршау дайындалған.

Бентли мен Лада  2020 жылдың жазында Нұр-Сұлтандағы айып тұрағынан табылған болатын.

Жануарлар цирк қызметкеріне тиесілі болып шықты. Олар Ресейден Қазақстанға заңсыз, құжатсыз әкелінген.