Белсенділерді күштеп шығарды: Темірлан Еңсебектің жақтастарын сот ғимаратынан алып кетті

10 сәуір күні Темірлан Еңсебектің сот процесін бақылауға келген бірқатар белсенділерді полиция қызметкерлері Наурызбай аудандық сот ғимаратынан күштеп шығарып, кейін Ішкі істер басқармасына алып кетті.

Бұл туралы Orda.kz хабарлайды.

Сот отырысы басталған сәтте белсенділер ғимарат ішіне кіре алмады. Сот өкілдері залда бос орын жоқ екенін айтып, олардың кіруіне рұқсат бермеді. Белсенділер бейнетрансляция қосуды талап еткенде, полиция олардың талабына жауап бермей, күш қолданып шығарып жіберді.

Полиция Айгүл Нұрболатова, Дархан Шәріпов, Ақторғын Ақкенжебаласы және Қонысбай Ырыскелдіні ұстап, бөлімшеге жеткізді.

Сотқа куәгер ретінде келген Темірланның сүйіктісі Мария Кочнева залға кіре алмады — белсенділермен қосып, оны да полиция алып кетті.

Еске салсақ, 9 сәуірде өткен сот отырысында Темірланның әкесіне өз ана тілінде сөйлеуге рұқсат берілмей, Қазақстан Республикасының  ”Тіл туралы” заңы өрескел бұзылып, орысша жауап беру талап етілген болатын.