Белгілі актриса Ғазиза Әбдінәбиева дүниеден өтті

Өмірінің 73-ші жылында белгілі қазақстандық актриса Ғазиза Әбдінәбиева дүниеден өтті. Әртістің қайтыс болғаны туралы театр режиссері Асхат Маемиров өзінің Instagram парақшасында хабарлады.

Бұл туралы Orda.kz хабарлайды.

— Ұлт руханиятының аспаны қара жамылды. Қазақ театры мен кино өнерінің мақтанышына айналған Ғазиза Әбдінәбиева дүниеден өтті. Аты жаман тажал ауру ешкімді аямады. Жарты ғасыр бойы қазақ театрының төрінде шынайылығымен, табиғи талантымен көрерменін тамсандырған Қазақстанның еңбек сіңірген артисі, «Парасат», «Құрмет» ордендерінің иегері Ғазиза Әбдінәбиева – жаны мен жүрегі мейірімге толы, адалдықты ту еткен болмысы бөлек жан еді.... Сахна кеңістігінде Мөржандай асыл аналардың, ару қыздардың бейнесін сомдаған аса талантты актриса, аяулы жан дүниеден өтті. Көкіректі кернейтін өкініш... - деп режиссер қайғысын білдірді.

Ғазиза Әбдінәбиева 1948 жылы 3 желтоқсанда Қызылорда облысы Сырдария ауданы Тартоғай кентінде дүниеге келген. Кеңестік, қазақстандық кино және театр актрисасы. Қазақстан Республикасының еңбек сіңірген әртісі.