Белгілі айтыскер, ақын Аманжол Әлтай мәжіліс депутаты болды

«АМАНАТ» партиясының парламент мәжілісі депутатының бос мандаты партиялық тізім бойынша Аманжол Әлтайға беріледі. Бұл туралы партияның атқарушы хатшысы Асхат Оралов мәлімдеді.

«Бүгін Саяси кеңес Бюросының қаулысымен «АМАНАТ» партиясы парламенті мәжілісінің депутаттық мандаты партиялық тізім бойынша Аманжол Әлтайға берілді. Тиісті шешім Қазақстан Республикасының Орталық сайлау комиссиясына жіберілді.

Аманжол Әлтайды атақты айтыскер, ақын-импровизатор, ғалым, филология ғылымдарының докторы ретінде ғана емес, белсенді азаматтық ұстанымы бар, ел мен халықтың мүддесін әрқашан бірінші орынға қоятын принципшіл тұлға ретінде де жақсы білеміз.

Ол бүгінгі партиямыздың алдында тұрған міндеттерді жүзеге асыруға ерекше үлес қосатынына сенімдімін» деп жазды Асхат Оралов Facebook-те.

Еске салсақ, бұған дейін Дариға Назарбаева депутаттық мандатынан айырылған болатын.