Бельгиялық қазақ баласына қатысты тағы да жаңалық шықты

Танымал тележүргізуші – Қымбат Досжан бельгиялық қазақ баласы – Жәнібекке қатысты тың дерек айтты, деп хабарлайды Orda.kz порталы.

Журналист бұл туралы өзінің инстаграм парақшасында мәлімдеді.

«Достар, Жәнібек балам жайлы соңғы ақпарат. Астана-Ыстамбұл-Барселона-Мальорка-Малага бағытына шыққан Түркіш ұшағы Астанадан кешігіп ұшып, Жәнібек қалған рейстердің бәрінен кешігіп қалған, бірақ, баламыз өзі айтқандай, жолы болғыш бала екен, түрік авиакомпаниясы - үш рет ұшақ ауыстырып жететін жеріне бір ғана ұшақпен жететіндей етіп жағдай жасап, тамағын беріп, Ыстамбұлдан Малагаға бір ақ жететін етіп билетін ауыстырып берген. Адамға адам секілді қараған түрік ағайынға мың алғыс!» деп алғысын білдірді.

Сондай-ақ Қымбат Досжан жазбада нақты шешім қабылдағанын тілге тиек етті.

«Баламыздың анасы, немесе әкесі (енді әкесін іздейміз деп нақты шешім қабылдап отырмыз) осылайша тез табылса екен деп тілеймін. Баланы әр көрген сайын, сөйлескен сайын «тегі жақсы, тіпті мықты тектен» екендігіне көз жеткіземіз Әсел екеуміз» деді ол жазбасында.