Беларусь президенті Назарбаевқа қатысты тың мәлімдеме жасады

Беларусь президенті Александр Лукашенко Қазақстан басшысы Нұрсұлтан Назарбаев пен Ресейдің бірінші басшысы Борис Ельцин үшеуі ішімдік ішкенін еске алды. Оның айтуынша, Ельцин мен Назарбаев оны арақ ішуге мәжбүрлеген.

РИА Новостидің хабарлауынша, Лукашенко ішімдікті құрмет үшін ішкен.

«Мен өзім ішетін адам емеспін, бірақ Ельцинмен аракідік ішіп тұруға тура келетін. Сыйлайсың ба, сыйламайсың ба, деген әңгіме. Енді сыйлайсың ғой. Мен ішімдікті мүлде жақтырмаймын» деді Лукашенко.

Сондай-ақ, Беларусь президенті ұқсас жағдай Назарбаевпен де болғанын баса айтты.

«Егер Назарбаев отыра беріп, маған: «Саша, бір бір рөмкеден» – десе, мен не айтамын? Ішпеймін деймін бе?» дейді Лукашенко.

Ол денсаулығына байланысты ішімдік ішпеуге тырысатынын айтты.

Лукашенконың араққа деген көзқарасын бірқатар шешімдерінен көруге болады.

«Адамдар екі күнде бір рет 70-100 грамм арақ ішіп тұрса, мен оған қарсы емеспін. Бірақ біз 70-100 грамм дегенді білмейміз. Егер біз үстел басына жайғасатын болсақ, бірден бір литр ащы суды тауысып тастаймыз. Ал бұдан денсаулық жақсармайды. Сондықтан шарапты тұтынудың еуропалық нұсқасын үйрену қажет» дейді саясаткер.