Бектенов СҚО-дағы су тасқынына қарсы жұмыстардың барысымен танысты

Премьер-министр Олжас Бектенов Солтүстік Қазақстан облысына жұмыс сапарымен барды. 

Солтүстік Қазақстан облысы су тасқыны қаупі бар аймаққа кіреді. Облыстың негізгі су көзі – Есіл өзені үш су қоймасы: Астана, Сергеев және Петропавл су тораптарымен реттеледі. Үкімет басшысы Петропавл су торабына барып, су қоймасының қазіргі жағдайын тексерді. 

Қазіргі уақытта ол қалыпты жағдайда және штаттық режимде жұмыс істеп тұр. 

Су тасқыны кезеңінде су қоймасы алгоритмге сәйкес жұмыстың «транзиттік режиміне» ауыстырылады және тасқын сулардың өтуіне әсер етпейді.

Сонымен қатар Олжас Бектенов былтырғы сәуір айында шамадан тыс толып кеткен Сергеев су қоймасы жағдайына назар аударды. 

«Су қоймалары бар Сергеев және Петропавл су тораптары – республикалық меншіктегі су шаруашылығы құрылыстарының тізбесіне енгізілген және ерекше стратегиялық маңызы бар су шаруашылығы құрылыстары. Сергеев су қоймасындағы жиналған судың көлемі – 82%. Бұл жерлерде саяжай учаскелерін ерекше назарда ұстауды тапсырамын», деді премьер-министр.

Премьер-министр Солтүстік Қазақстан облысының әкімдігіне жоспарланған барлық алдын алу іс-шараларын аяқтауды, ал ТЖМ-ға су тасқыны жағдайы ушыққан жағдайда күштер мен техниканы жұмылдыруды тапсырды.

«Өздеріңіз көріп отырғандай, еліміздің бірқатар өңірінде су деңгейі көтеріліп, су тасқыны болды. Барлық күш жұмылдырылды. Республикалық және өңірлік жедел штабтар тәулік бойы жұмыс істеп жатыр. Қазіргі таңда төтенше жағдайлар, ішкі істер, қорғаныс министрліктері мен ұлттық қауіпсіздік комитетінің арнаулы күштері мен құралдары — барлығы 4 мыңға жуық адам, 1,3 мыңнан астам техника су тасқынына қарсы жұмыстарға тартылды. Жол қатынасы қиын жерлерде адамдар тікұшақтармен эвакуацияланып жатыр. Жұмыстар қауіп толық сейілгенше жалғасады. Жағдай қатаң бақылауда. Зардап шеккендерге үкімет және әкімдік тарапынан қажетті көмек көрсетіледі», деді Олжас Бектенов.