Бекетаев Қаржы вице-министрі қызметінен босатылды

Үкіметтің қаулысымен Руслан Бекетаев басқа жұмысқа ауысуына байланысты қаржы вице-министрі қызметінен босатылды. Бұл туралы премьер-министрдің баспасөз қызметі хабарлады.

Үш күн бұрын Еуразиялық үкіметаралық кеңестің мүшелері оның ЕЭК Экономика және қаржы саясаты министрі қызметіне кандидатурасын қолдады.

Руслан Бекетаев 1975 жылы Оңтүстік Қазақстан облысында дүниеге келген. Қазақ мемлекеттік аграрлық университетін бітірген (1996), экономист-есепші. Бристоль университеті, Ұлыбритания экономика, қаржы және менеджмент магистрі, Оксфорд университеті, Саид бизнес мектебі, Ұлыбритания, Қаржы стратегиясы бойынша дипломы бар.

1996-2001 жылдары - жетекші маман, сектор меңгерушісі, бөлім бастығы, бөлім бастығының орынбасары, Қазақстан Республикасының Бағалы қағаздар жөніндегі ұлттық комиссиясының лицензиялау және қадағалау департаменті директорының орынбасары.

2001-2004 жылдары - ҚР Ұлттық Банкінің Қаржылық қадағалау департаментінің инспекция бөлімінің бастығы.

2004-2005 жылдары - ҚР Қаржы нарығы мен қаржы ұйымдарын реттеу және қадағалау агенттігі Банктік қадағалау департаментінің инспекция бөлімінің бастығы.

2005 жылдан 2010 жылға дейін – ҚР-ның Экономикалық қылмысқа және сыбайлас жемқорлыққа қарсы күрес агенттігінде қаржы полициясында қызмет еткен.

2011 жылы - «Қазақ гуманитарлық заң университеті» акционерлік қоғамы басқарма төрағасының кеңесшісі.

2011-2012 жылдары - ҚР Қаржы министрлігі Қаржы мониторингі комитеті төрағасының орынбасары.

2012 жылдан 2014 жылға дейін - ҚР Қаржы министрлігі Қазынашылық комитетінің төрағасы болып қызмет етті.

2014 жылдан 2021 жылға дейін - ҚР Қаржы вице-министрі.

«Ерен еңбегі үшін» медалімен марапатталған (2008), қаржы жүйесінің үздігі (2011).