Бекболат Тілеухан елорданың атауын өзгертуге қарсы шықты

Экс-депутат Бекболат Тілеухан елордаға Астана атауын қайтару туралы ұсыныс жасаған депутаттарды сынға алды.

«Алатаудың бауырында туған Алматы облысының жігіті Алматыдан астананы Ақмолаға ауыстырды. Руласы да, сырласы да қарсы болды. Бәріміз куәміз. Ештеңеге қарамады. Ауыстырып әкелді. Мұрат асыл болатынын, мақсат айқын болатынын, қазаққа қажетті болашақты болжай білгендіктен, Назарбаев солай істеді. Осы біз саясаттың тереңіне бойлай алмай қалғанбыз ба, ағайын?!

Кеше ғана Хрущевтың шенгелінен аман қалған Ақмола еді ғой. Сол Ақмоланың алғашқы астана қылғандағы ойдың тереңін түсінетін жағдайымыз бар ғой, ағайын. Астанамыздың Нұр-Сұлтан аталуы - бұл тарихи әділеттілік, ердің ерекше еңбегіне берген баға, Алаштың алғысы. Айтылған сөз, аталған есім атқан оқтай қайтпаса, нағыз әділдік осы болар еді, ағайын» деп ой қозғады Бекболат Тілеухан.

Сонымен қатар, ол өз үндеуінде депутаттардың бұл әрекеттерін сынға алды.

«Назарбаевтың көзіне қалай түсерін білмей жүрген бір-екі депутат Нұр-Сұлтанның атын жойып, Алаштың аяулы ақсақалының сағын сындырмаққа бастама көтерді. Бірақ бұл бүкіл қазақтың көзқарасы деп түсінбейміз. (...) Астананың аты тағы өзгеріп жатса, берекесі, мазасы қашқан ел дейді ғой. Сондықтан тарихи әділдікке жүгініп, астана атауы Нұр-Сұлтан деп аталды. Сол атауында қалу керек» деді экс-депутат.

Бекболат Тілеухан желіде жарияланған бейне үндеуінде айтылған сөздері Тоқаевтың жолдауына қарсы бағытталмағанын және оның қазаққа арналғанын ерекше атап өтті.

Еске салсақ, жақында депутаттар елорда атауын қайта Нұр-Сұлтан деп өзгертуге бастама көтерген. Олардың айтуынша, адамның көзі тірі тұрғанда оның атымен қаланы атау дұрыс емес.

Айта кетсек, 2019 жылы наурыз айында елорда атауы елбасының құрметіне Астанадан Нұр-Сұлтанға өзгертілген болатын.