Мәжілістің экс-депутаты Бекболат Тілеухан Қазақстанда болған жағдай және «Қасіретті қаңтар» бойынша өз пікірімен бөлісті.
– Біздің 30 жылдық төл тарихымызда болмаған үлкен сынды бастан кештік. Бұл да бір ел тарихындағы өту керек кезең шығар бәлкім. Осы бір кезеңде бізге бұрын-соңды болмаған дәрежеде тас-түйін бірлік керек. Осы бірлік ғана біздің тәуелсіздігімізді сақтап қалады.
Ең бастысы мемлекетшілдік, ұлтжандылық болатын болса біз бұл сынақтан да абыроймен өтеміз, – деді экс-депутат Qazaqstan телеарнасына берген сұхбатында.
Тілеуханның айтуынша, Қазақстан президент Қасым-Жомарт Тоқаевпен жарқын болашақ күтіп тұр.
– Президент тарапынан қаншама қадамдар жасалып жатыр. Осының бәрі түбінде жақсы нәтиже беретініне мен сенімдімін, – деп түйіндеді Бекболат Тілеухан.
Еске салсақ, әлеуметтік желілерде Мәжілістің бұрынғы депутаты Бекболат Тілеуханның ұсталғаны туралы ақпарат тарап жатты. Оның Сауд Арабиясындағы Мекке қаласында екенін экс-депутаттың туыстары растады.
2021 жылдың 29 желтоқсанында Тілеухан Мәжіліс депутаты ретіндегі өкілеттігін тоқтатқан болатын. Отырыстан шыға салысымен жанжалға ілікті. Журналистермен әңгімелесу барысында Тілеухан журналист Айнұр Қоскинаның сөздеріне «тиіскен», оның сұрақтары экс-депутатқа ұнамай қалған екен. Ауызша сөз жарысының соңында журналист экс-депутатпен бірге лифтке кірді. Ол шыққаннан экс-депутат Тілеуханның өзін ұрғанын, сонымен қатар жеке затын бұзғанын айтты.
