Бейжің Олимпиадасы: Қалың қарға байланысты фристайл жарысы тоқтатылды

Қытайдағы қалың жауған қар «слоупстайл» бойынша әйелдер арасындағы фристайл жарысының тоқтатылуына себеп болды.

Бүгін таңертең Чжанцзякоу мен Яньциндегі Олимпиада нысандарын жауған қалың қар әйелдердің «слоупстайл»  бойынша біліктіліктерін сынауына кедергі  болды. Сонымен қатар, ұйымдастырушылар шаңғышыларға арналған жаттығулардыда  тоқтатты.

Халықаралық Олимпиада комитетінің (ХОК) баспасөз қызметі Бейжің метеорологиялық қызметі қардың қалың түсуіне байланысты «сары» ескерту жариялағанын хабарлады . Жергілікті билік тұрғындар мен қонақтарға, әсіресе, қала сыртына шықпауға кеңес берді.

ТАСС агенттігінің хабарлауынша, фристайл жарысы бастапқыда жергілікті уақыт бойынша сағат 10:00-де басталуы керек еді, бірақ  12:00-ге шегерілді. Кейіннен жарыстың іріктеу кезеңі 14 ақпанда басталып, финалдық жарыстар 15 ақпанда өтетіні белгілі болды.

Еске салайық, Бейжіңде 20 ақпанда аяқталатын Қысқы Олимпиада ойындары өтуде. «Слопстайлдан»  27 спортшының қатысатындығы жарияланғаны белгілі.