Бейжіңде Ахмет Байтұрсынов пен Роза Бағланованы еске алу кеші өтті

Бейжіңде Ахмет Байтұрсынов пен Роза Бағланованы еске алу кеші өтті, деп хабарлайды ҚР Сыртқы істер министрлігінің баспасөз қызметі.

«А.Байтұрсынұлының 150 жылдығы мен Р.Бағланованың 100 жылдығын мерекелеу аясында Қазақстанның Қытайдағы Елшілігінде атақты мерейтойларға арналған салтанатты шара өтті. Шара аясында қазақ диаспорасының өкілдері мен қазақстандықтардың өскелең ұрпағы үшін ұлы қазақстандық қайраткерлердің өмірі мен қызметі туралы дәріс ұйымдастырылды, сондай-ақ А.Байтұрсынұлының қазақ жазуының дамуына қосқан үлесі туралы деректі фильм көрсетілді» делінген хабарламада.

Шығармашылық кеш барысында А.Байтұрсынов пен Р.Бағланованың мерейтойларына арналған пошталық конверттердің тұсаукесері өтті. Бұл конверттерді елшілік қытайлық «Beijing Diplomatic Gift Co.Ltd» компаниясымен бірлесіп шығарған.

Мерекелік концерт шараға ерекше көңіл-күй сыйлап, қазақ және қытай жастары А.Байтұрсынұлының әйгілі шығармаларын жатқа айтып, вокалдық және би өнерін ұсынды.