Батысты судан қорғау үшін 10 мың әскер жұмылдырылды

Премьер-министр Олжас Бектенов су тасқынына байланысты жедел штабтық жұмыс кеңесін өткізді, деп хабарлайды Orda.kz порталы.

Мақсаты - Батыс Қазақстандағы су тасқынының екінші толқыны қарсаңындағы жағдай.

Вице-премьер Қанат Бозымбаев Ресей Федерациясынан Жайық өзені арқылы көлемді судың күтіліп отырғаны туралы баяндады. Сондай-ақ Батыс Қазақстан облысында жаңбыр күтіледі. Болжамға сенсек, Жайық және Сақмар өзендерінің жоғарғы жағынан сәуір айының екінші онкүндігінде Батыс Қазақстан облысының аумағына тағы да су келеді.

«Қазіргі уақытта Орал қаласындағы Жайық өзеніндегі су деңгейі – 728 см, ол 850 см қауіпті межеге жақындайды деп болжанып отыр. Батыс Қазақстан облысынан судың келуіне байланысты Атырау облысында өткен тәулікте Жайық өзеніндегі гидробекеттерде де су деңгейінің шамалы көтерілуі байқалады» делінген хабарламада. 

Екінші толқынға ТЖМ, ІІМ және Ұлттық ұланның, Қорғаныс министрлігінің күштері мен құралдары жұмылдырылды. Батыс Қазақстан облысында авариялық-құтқару жұмыстарын жүргізу үшін күштік құрылымдар 6 мың адамға, Атырау облысында 4 мың адамға дейін жеткізіледі.

«Орал мен Атырау бойынша күштер мен құралдарды барынша жұмылдыру қажет. Қазір үлкен суды елді мекендерге жеткізбей, бұрып әкету маңызды. Бүгін қосымша әскери қызметшілер мен техника жіберіле бастады. Су ағысы қарқынын ескере отырып, бірінші кезекте Оралды, одан әрі Атырауды күшейтеміз», — деді Олжас Бектенов.