Батыс елдерінің іс-әрекеттері адамгершілікке жатпайды – Талибандар

Талибандардың өкілі (Жоғарғы Соттың шешімі бойынша Қазақстанда тыйым салынған ұйым) Забихулла Муджахид Батыс елдерін Ауғанстаннан білікті ауған мамандарын эвакуациялады деп айыптады.

Бұл туралы Orda.kz The Week-ке сілтеме жасап хабарлады.

Муджахид Талибандар бұрынғы аудармашылар мен АҚШ әскерінде жұмыс істегендерді іздестіріп жатыр деп мәлімдеді. Муджахид Ауғанстанда олардың қауіпсіздігі қорғалады деп сендірді. Ол сондай-ақ, Батыс елдерінен көңілі қалғанын айтты. Себебі олар елден азаматтарды эвакуациялаған. Бұл туралы Талибандардың өкілі The New York Times басылымына берген сұхбатында айтты.

– Олар біздің елдің істеріне араласпауы керек және біздің адами ресурстарымызды: дәрігерлерді, профессорларды және бізге қажет басқа да адамдарды алып кетпеуі керек. Америкада олар ыдыс жуғыш немесе аспазшы бола алады. Бұл адамгершілікке жатпайды, - деді Муджахид.

Ол сондай-ақ елден кетуге тырысқан ауғандықтардың жарамды жол жүру құжаттары бар екенін, ешкімнің әуежайға кіруіне кедергі жасамайтынына сендірді.

– Біз тиісті құжаттары жоқ адамдарға жол жүруге тыйым салынғанын айттық. Оларға баратын елдердің төлқұжаттары мен виза қажет, содан кейін олар елден ұшып кете алады. Егер олардың құжаттары жарамды болса, онда біз оларға бұрын не істегендерін сұрап, тиіспейміз, - деді ол.

Әйел құқығы

Мужахид Талибан әйелдерді қайтадан үйде отырғызып, оларды беттерін жабуға мәжбүрлейді деген түсінік негізсіз дейді. Ол махрам деп аталатын қорғаншы ер адаммен жүру талабы дұрыс түсінілмегенін айтты. Оның айтуынша, бұл талап үш күнге және одан да көп уақытқа созылатын сапарларға ғана қатысты.

– Егер олар мектепке, кеңсеге, университетке немесе ауруханаға барса, оларға махрам қажет емес, - деп түсіндірді ол.

Мужахид талибтер халықаралық қоғамдастықпен жақсы қарым-қатынас орнатады деп үміттенетінін білдіріп, терроризммен күресу, апиынды жою және Батыс елдеріне босқындар санын азайту бойынша ынтымақтастық бағыттарын көрсете білді.

Сондай-ақ, Муджахид Талибандарды барынша жақсы жағынан көрсеткісі келсе де, қоғамдық орындарда музыкаға тыйым салынғанын растады.

Бұған дейін тәліптер ауғандықтар үшін Кабул әуежайына кіруді жауып тастаған.

Еске салсақ, 15 тамызда Талибандар Ауғанстан астанасы Кабулды басып алып, Ислам Әмірлігінің жандануын жариялаған. Сол күні елден Ауғанстан президенті Ашраф Ғани кеткен. Бір аптада Кабулдан 25 мыңға жуық адам эвакуцияланған.