Батыс Қазақстандағы жол апатына кінәлі полицей қамауға алынды

Сот Батыс Қазақстан облысында мас күйінде жол-көлік оқиғасын жасаған полиция қызметкерін қамауға алуға санкция берді. Ақпаратты облыстық полиция департаменті растады.

Сот санкциясымен күдікті екі айға қамауға алынды.

Зардап шегуші полицейдің ұсталуына қатысты пікір білдірді.

«Оқиға салдарынан анам қайтыс болды. Жеті айлық қызымның аяғы жұлынып кетті. Біз ауруханада жатырмыз. Жол апатынан әйелім де зардап шекті. Менің отбасым кінәліге ең ауыр жаза тағайындалуын талап етіп отыр» деді Төрехан Бекжанов.

Еске салсақ, 1 желтоқсан күні кешке Орал-Тасқала тас жолында екі көлік бетпе-бет соқтығысқан. «Hyundai Accent» көлігін БҚО Теректі ауданына қарасты кенттік полиция бөлімі бастығының орынбасары жүргізген. Оның жол апаты кезінде мас болғаны анықталған. Полицей дереу қамауға алынды.

Оқиға салдарынан Lada Largus автокөлігінің салонында болған 51 жастағы әйел сол жерде қайтыс болып, жеті айлық қыз ауыр жарақат алған. Оның аяғы жұлынып кеткен. Полицейлер оқиғаны жан-жақты тексеріп, кінәлілерді заң аясында жазалауға уәде берді.