Батыс Қазақстанда шенеунік ер адамды пышақтады деген күдікке ілінді

Ақжайық ауданы әкімдігінің ішкі саясат бөлімінің басшысы 28 жастағы жігітті пышақтады деген күдікке ілінді.

Мой город басылымының хабарлауынша, оқиға 14 ақпанда болған. Түн ортасында 28 жастағы ер адам Чапаево кентіндегі аудандық аурухананың жедел жәрдем бөліміне пышақ жарақатымен жеткізілді.

«Аталмыш фактіге қатысты ҚР Қылмыстық кодексінің 106-бабы «Денсаулыққа қасақана ауыр зиян келтіру» бойынша сотқа дейінгі тергеу басталды. Күдікті үйқамаққа алынды» деп хабарлады полицейлер.

Күдікті Ақжайық ауданы әкімдігінің ішкі саясат бөлімінің басшысы болып жұмыс істеген Армат Хайруллин болып шықты. Сол күні шенеуніктің үйіне жәбірленушінің өзі келіп, олардың арасында жанжал туындаған. Ер адамдар арасындағы қақтығысқа нақты не себеп болғаны белгісіз. Облыс әкімдігі 17 ақпанға дейін Армат Хайруллиннің жұмыс орнында болғанын хабарлады.

«17 ақпанда ол өз еркімен жұмыстан кету туралы арыз жазды. Оған қазіргі отбасылық жағдайы себеп болды» деп атап өтті Ақжайық аудандық әкімдігі.

Денсаулық сақтау басқармасының баспасөз қызметі дәрігерлер жәбірленушінің жағдайын тұрақты және ауыр деп бағалап отырғанын, оның кеудесі мен ішіне пышақ жарақаты тигенін хабарлады. Ер адамға ота жасалып, қазір облыстық көпсалалы аурухананың жансақтау бөлімінде жатыр.