Батыс Қазақстанда шаруалар Тоқаевтың тапсырмасын орындамағанын айтты

Шаруалар Батыс Қазақстан облысының билігі президент Қасым-Жомарт Тоқаевтың тапсырмасын орындамағанын мәлімдеді.

«Ел президентінің облысымызда мал азығы дақылдарын өсіру үшін жайылымдық жерлерді суару туралы тапсырмасы орындалмай жатыр. Өткен жылы Жанғала ауданының диқандары 20-30 млн теңге көлемінде өз қаражаттарын салып, жер жыртып, учаскелеріне жарық пен су тарту жұмыстарын жүргізіп, малға азықтық шөптерді егу жұмыстарына әзірленген. Бірақ қаржы болмай, шығынға ұшырап, егін еге алмай қалды» дейді «Шопан ата» республикалық бірлестігінің БҚО бойынша филиалының өкілі Талғат Байкенов.

2021 жылы билік суару мәселесі облыс әкімінің бақылауында болғандықтан, шешімін табамыз деп уәде бергенімен, уақыт өтіп кетті. Құзырлы орындардан ешбір шара байқалмайды. Қаржы тапшылығынан егіс алқабын дайындамаған диқандар биыл да мал азығын егіп үлгермейді. Дегенмен топырақты дайындап, барлық қажетті құжаттарды жинаған шаруаларға көмектесуге әлі де уақыт бар.

«Жағдай биыл да қайталанып отыр, біз егістіктерді суару үшін жеңілдікті несиелер мен субсидияларды көріп тұрған жоқпыз. Сондықтан облыс әкімімен кездесіп, бізге қалай көмектесуге ниетті екенін сұрағымыз келеді» деді Бәйкенов «Уральская неделя» басылымына.

Шаруалар билік осы үндеуді көріп, өздерімен жүздеседі деген үмітте.

«Себебі, қаражат бөлінгенше бір ай өтеді, техникаға тапсырыс беріліп, жеткізілгенше, тағы екі ай өтеді, өңірлерде малға азықтық дақылдар тағы егілмейді. Шығындардың ауқымы орасан зор болады. Өйткені, іс жүзінде малымыз жем-шөпсіз қалады» деп қосты Бәйкенов.

Қазіргі таңда ауданда мал азығы жоқ болғандықтан, Жанғала ауданының шаруалары малдарын өздеріне тиесілі емес жайылымға айдап кеткен.