Батыс Қазақстанда мас полицей ұйымдастырған жол апатынан бір адам қаза тапты

Батыс Қазақстан облысындағы Орал-Тасқала тас жолында Теректі аудандық ПБ кенттік полиция бөлімі бастығының орынбасары мас күйінде жол апатына ұшырады.

Қайғылы жағдай туралы полиция департаментінде өткен брифингте хабарланды.

«1 желтоқсан күні сағат 19:15-те Орал-Тасқала автожолының 46-шы шақырымында полиция қызметкерінің қатысуымен екі жеңіл көліктің соқтығысуы орын алды. Бір адам қаза тауып, тағы екі адам дене жарақатын алды.

Hyundai Accent көлігін айдаған полицей Lada Largus-пен қақтығысты.

Анықталғанындай, полиция қызметкері көлікті мас күйінде жүргізген. Марқұмның туыстарына көңіл айтамыз» деді БҚО ПД бастығының орынбасары Нұрлан Рамазанов.

Полиция қызметкері осы себептерге байланысты құқық қорғау органдарынан міндетті түрде босатылатыны хабарланды. Қазіргі уақытта ҚР ҚК 345-бабы бойынша сотқа дейінгі тергеу басталды. Полицей қамауға алынды.