Батыс Қазақстанда әкімнің орынбасары қызметінен босатылды

Батыс Қазақстан облысы әкімінің орынбасары Аманжол Алпысбаев қызметінен босатылды.

Мой город басылымына әкімнің баспасөз қызметі аймақ басшысының 2021 жылғы 30 желтоқсандағы өкімімен БҚО әкімінің орынбасары Аманжол Алпысбаев қызметінен босатылғанын хабарлаған.

Оның өкілеттігі мемлекеттік қызметке сәйкес келмейтін жұмыс жағдайларына байланысты тоқтатылды.

«Аманжол Алпысбаев бұл қызметте 2019 жылдың шілде айынан бері қызмет етіп келеді және осы уақыт ішінде ол өзін үлкен тәжірибесі бар жауапты маман ретінде көрсетті. Ол облыс бойынша мемлекеттік сатып алудың үш жылдық жоспарын әзірлеу барысына және басқа да бюджет қаражатын үнемдеу және тиімді пайдалану мәселелерін талдауға тікелей қатысты. Аманжол Әлиханұлына алғысымызды білдіреміз. Жұмысына сәттілік, одан әрі кәсіби табыстар тілейміз!» деп атап өтті облыс әкімдігі.

Аманжол Алпысбаев сәулет, қала құрылысы және құрылыс, тұрғын үй-коммуналдық шаруашылық салаларындағы стратегиялық жоспарлауды, сондай-ақ тарифтік саясат, МЖӘ дамыту, мемлекеттік сатып алулар, қоршаған ортаны басқару, өсімдіктер мен жануарлар дүниесін қорғау мәселелерін басқарды.

Айта кетсек, былтырғы жылдың маусым айында Алпысбаев «Мемлекеттік қызмет туралы» заңды бұзды деген күдікке ілінді. Мемлекеттік қызмет істері агенттігінің департаментінің мәліметінше, Алпысбаев мемлекеттік қызметкер бола отырып, сонымен қатар «Самұрық Гидро» ЖШС құрылтайшысы және директоры болып табылады. Басқарма облыс әкімдігіне әкім орынбасарының қызметінен кетуі керектігі туралы ұсыныс жолдады. Аманжол Алпысбаевтың өзі мұнымен келіспей, төрт рет сотқа шағым түсірген. Барлық жағдайда сот оған қарсы шешім шығарды. Кассациялық сотта шағым да қанағаттандырусыз қалдырылды.