Батыс Қазақстанда инспекторға оқ атқан ер адам бостандықта жүр

БҚО полицейлері аң аулауға тыйым салынған қорық аумағында орман шаруашылығы инспекторының өліміне қатысты тергеуді жалғастыруда.

Батыс Қазақстан облысының полиция департаменті бұл дерек бойынша ҚР Қылмыстық кодексінің 104-бабы «Абайсызда адам өліміне әкеп соғу» және 337-бабы «Заңсыз аңшылық» бойынша екі қылмыстық іс қозғалғанын хабарлады.

«44 жастағы күдікті ешқайда кетпеу туралы қолхат жазды. Бірқатар сараптамалар тағайындалды. Тергеу амалдары жүргізілуде» деп хабарлады БҚО полиция департаментінің баспасөз қызметі.

Еске салсақ, 14 желтоқсан күні таңертең БҚО Теректі ауданында орналасқан Бударин қорығында үш ер адам аң аулап жүрген. Полицияның мәліметінше, аңшылардың бірі абайсызда мылтықтан оқ атқан. Оқ БҚО аумақтық орман шаруашылығы және жануарлар дүниесі инспекциясының бөлім басшысы Серік Мәженовке тиген. Ол артынша ауруханада көз жұмған.

Инспекцияның тікелей басшысы олардың қарамағындағы қызметкердің рейдте жүргенін айтты. Бірақ полицейлер инспектордың заңсыз аңшылықпен айналысқанын алға тартады.