Батыс Қазақстанда қаза болған инспектор туралы жаңа мәліметтер пайда болды

«ҚР Экология, геология және табиғи ресурстар министрлігі Орман шаруашылығы және жануарлар дүниесі комитетінің Батыс Қазақстан облыстық орман шаруашылығы және жануарлар дүниесі аумақтық инспекциясы» РММ басшысы Қайрат Қадешев қарамағындағы қызметкерінің өліміне қатысты пікір білдірді.

Уральская неделя басылымының хабарлауынша, марқұм Серік Мәженов 15 жылдан астам аңшылық инспекторы болып жұмыс істеген.

«Серік Мәженов табиғатты қорғау полициясымен бірлесе жұмыс істеу тапсырмасымен Бударин паналауында рейдте болған. Біздің тексеруіміз бойынша рейдте ол жалғыз болған. Одан әрі не болғаны белгісіз. Ақбөкенді қорғау төңірегінде көптеген азғырулар бар – оны ешнәрсе адастырған жоқ. Өзі аңшы емес, мылтығы жоқ. Қызметіне қатысты ешқандай шағым болған емес. Өткен жылы өз қызметін жақсы атқарғаны үшін Елбасының қолы қойылған Алғыс хат алды. Тергеу бәрін көрсетеді» деді Қайрат Қадешев.

Инспектордың өліміне әкелген оқ тегіс ұңғылы МР-153 винтовкасынан атылған. Бұл ретте Серік Мәженовтың қаруды абайсыз ұстау салдарынан қаза тапқаны хабарланды.

Серік Мәженовтың артында екі баласы қалды – қызы мен ұлы, екеуі де студент.

Еске салсақ, бұған дейін БҚО полиция департаментінің баспасөз қызметі Мәженов пен тағы екі жігіт Теректі ауданы, Ақжайық ауылынан 15 шақырым жерде Бударин қорығында аң аулап жүргені туралы хабарлама таратқан болатын. Қаруды қайта оқтап жатқан кезде ерлердің бірі оқ атқан, оқ екіншісіне тиген. Жаралы азамат Ақжайық ауылындағы ауруханаға жеткізіліп, сол жерде көз жұмған.

«Абайсызда адам өліміне әкеп соқтыру» бабы бойынша сотқа дейінгі тергеу басталды. Тиісті сараптамалар тағайындалып, тергеу амалдары жүргізілуде.