Батыс Қазақстанда 9 күн бұрын жоғалып кеткен ер адамның мәйіті табылды

Батыс Қазақстан облысында Бәйтерек ауданы Январцево ауылының 34 жастағы тұрғынын өлтіру дерегі бойынша сотқа дейінгі тергеу басталды. Полицейлер күдіктінің ұсталғанын айтты.

Михаил Крайнов 2021 жылдың 23 қарашасынан бері хабар-ошарсыз кеткен. Оның әпкесі Клавдия Крайнова бір күн бұрын ер адам әйелімен көршілерінің туған күніне барғанын айтты. Әйелі үйге қайтып кеткен, ал Михаил ары қарай тойлатқан.

– Ер адамдардың арасында жанжал шығып, олар сыртқа кеткен. Сол кезде кісі өлімі орын алған. Төрт ер адам Михаилды соққының астына алған. Алдымен оны тұншықтырып өлтіріп, сосын тамағына өткір темір тығып алған. Онда саусақ сиятындай тесік болды. Түрден түр қалмаған. Марқұм мықты жігіт еді, онымен жекпе-жекке шықса ешкім жеңе алмайтын. Артында бірінші некеден бір қызы, екінші некеден ортақ қызы бар, - деді марқұмның әпкесі.

БҚО полиция департаментіне 30 қарашада Январцево ауылы маңындағы Жайық өзенінен із-түзсіз жоғалғандар тізімінде тұрған ер адамның мәйіті табылғаны туралы хабарланды.

«Аталмыш факті бойынша ҚР Қылмыстық кодексінің 99-бабының 1-бөлігі «Адам өлтіру» бойынша қылмыстық іс қозғалды. Жедел-іздестіру шаралары барысында Приуральный полиция бөлімінің қызметкерлері кент тұрғынын анықтап, ұстады. Осы қылмысты жасағанын мойындаған адам Январцево уақытша ұстау изоляторына қамалды» деп хабарлады БҚО полиция департаментінің баспасөз қызметі.