Батыс әуе компаниялары Ресейді айналып ұшу қажеттігінен шығынға батуда

Bloomberg: АҚШ пен ЕО әуе компаниялары Ресей аспанын жапқаннан кейін жанармай құнын арттырды.

Батыстың осындай шектеулеріне жауап ретінде Ресей әуе кеңістігін АҚШ пен Еуропалық Одақ әуе компаниялары үшін жабылуы Азияға ұшу үшін жанармай құнының айтарлықтай өсуіне әкелді, деп жазады Bloomberg.

Air France-KLM және Жапонияға бет алған басқа еуропалық тасымалдаушылар Қазақстан мен Моңғолия арқылы Ресейді айналып өтуге мәжбүр, бұл жол жүру уақытын бірнеше сағатқа ұзартады. Осылайша, Париж-Токио рейсі қазір 14 сағатқа созылады, бұл компания үшін рекордтық көрсеткіш. Дәл сол себепті Британдық Virgin Atlantic Гонконгқа ұшудан бас тартты.

Финляндияның Finnair ұлттық тасымалдаушысы Хельсинкиде Шығыс Азияны Еуропамен және АҚШ-пен байланыстыратын хабты ұзақ уақыт бойы салған, бірақ қазір Жапония, Қытай және Кореяға рейстерде қиындықтарға тап болды. Осылайша, Токиоға ұшулар енді 9,5 емес, 13,5 сағат алады. Оның үстіне жанармай құнының өсуі бұл рейстерді тиімсіз етіп жіберді.

«Еуропалық тасымалдаушылардың көпшілігі қай бағыттар әлі де тиімді екенін және дұрыс есептеу үшін жиіліктерді өзгерту, аялдамалар қосу немесе қосымша рейс қосу қажет пе дегенді зерттейді» деді Martin Consulting авиаконсалтингтік фирмасының негізін қалаушы Марк Мартин.

Бұл ретте Таяу Шығыстағы ірі тасымалдаушылар – Emirates, Qatar Airways және Etihad Airways Батыстағы бәсекелестерінен гөрі артықшылықтарға ие болды. Олардың елдері Ресейге қарсы санкция қолданбады және оның әуе кеңістігіне кіру мүмкіндігін сақтап қалды.

Air India да өз мүмкіндігін тиімді пайдалуда. Соңғы аптада бұл тасымалдаушының АҚШ пен Канадаға ұшу уақыты Air Canada және United Airlines-ке қарағанда орта есеппен бір жарым сағатқа аз болды. Яғни, дәл сол бағыттар бойынша үнділік тасымалдаушы Ресейдің үстінен ұшуға құқығы жоқ бәсекелестеріне қарағанда 7,5 тонна жанармай аз жұмсаған. Осылайша, рейс үшін үнемделген қаражат шамамен 8,5 мың доллар болған.

Air India АҚШ-тың Батыс жағалауына ұшуды жалғастыруда және мысалы, Мумбай мен Бангалордан Сан-Францискоға жаңа рейстерді ашу үшін өзінің ұзақ мерзімді флотын кеңейтуді көздеп отыр. Сол уақытта United Airlines Сан-Францискодан Бангалорға, Сан-Францискодан Нью-Делиге және Ньюарктан Мумбайға рейстерді тоқтатты.

Ресей армиясының Украинадағы арнайы операциясы басталғаннан кейін Батыс елдері Мәскеуге қарсы қатаң санкциялар енгізді. Азаматтық авиация секторы шабуыл астында қалды. Осылайша, ЕО Ресейге азаматтық ұшақтар мен қосалқы бөлшектерді жеткізуге тыйым салып, жалға берушілерді ресейлік әуе компанияларымен келісім-шартты бұзуға міндеттеді. Ұшақтарға техникалық қызмет көрсету және сақтандыру қызметтеріне де тыйым салынды, ал Еуропалық Одақ, АҚШ, Канада және басқа да бірқатар елдер ресейлік ұшақтар үшін аспанды жауып тастады, Ресей оған дәл сондай жауап берді.