«Басқа адаммен шатастырып алды»: Полиция Инга Иманбайдан кешірім сұрады

Алматыда құқық қорғаушы, Жанболат Мамайдың жұбайы Инга Иманбайды «Жібек жолы» метросы бекетінде құқық қорғау органдарының қызметкерлері ұстады, деп хабарлады Orda.kz.

Алайда артынша полиция Инганы біреумен шатастырып алғанын мәлімдепті.

«Басшылықтан біреу келді — мені босатты. Полиция қызметкері кешірім сұрады», — деді ол.

Алайда сотталған Жанболат Мамайдың жұбайы, полиция қызметкерінің телефонынан өзінің суретін көргенін атап өтті.

Инга ұстап жатқанда редакциямызға қоңырау шалып, полиция қызметкерлерінің телефонында өзінің суреттері бар бағыттама болғанын айтты.

«Мені  Жібек жолы метро стансасы маңында полиция ұстады. Неліктен екенін білмеймін. Олардың телефонында менің паспорттық суретім мен Момышұлы метросына кіріп бара жатқан суретім болды. Олар себептерін түсіндірмеді», — деді Инга. 

Ол өзін саяси көзқарасына бола ұстады деп отыр.

«Мен заңгер және құқық қорғаушымын. Қандай да бір қылмыстарға немесе басқа бұзушылықтарға қатысым жоқ. Өзімді ұстау себебі соңғы істерім — Ербаян Мұхтардың ісі және саяси көзқарастарыма қатысы бар шығар деп топшылаймын», — деп толықтырды ол.

Бірнеше минуттан кейін оған қайта қоңырау шалдық. Инга оны босатқанын айтты.

Еске салсақ, 9 қыркүйекте Жоғарғы сот Жанболат Мамайдың ісін қайта қараудан бас тартты. 2023 жылдың көктемінде оған ҚР ҚК-нің үш бабы бойынша алты жыл шартты жаза кесілді. 

Тағылған айыптар:

— «Полицияны қорлау» (ҚР ҚК 378-бабы);
— «Жалған ақпарат тарату» (ҚР ҚК 274-бабы);
— «Жаппай тәртіпсіздік ұйымдастыру» (ҚР ҚК 272-бабы).