Бас әскери прокурор тағайындалды

Мемлекет басшысының келісімі бойынша Бас Прокурордың өкімімен Дастан Әбдіқадырұлы Секенов Бас әскери прокурор болып тағайындалды, деп хабарлайды Қазақстан Республикасы Бас прокуратурасының баспасөз қызметі.

Д.Ә.Секенов Прокуратурадағы қызметін 1996 жылы Алматы қаласы Ақсай шағын ауданында тағылымдамадан өтуден бастаған. 2001 жылға дейін Алматы қаласының прокуратурасында түрлі лауазымдарда қызмет атқарған. 2001-2009 жылдар аралығында Бас әскери прокуратурада басшылық қызметтерді атқарған. 2009 жылы Талдықорған гарнизонының әскери прокуроры болып тағайындалды.

2014-2018 жылдары Қаржы және Ұлттық экономика министрліктерінде басқармаларды басқарды. 2018 жылдан Президент Әкімшілігінде жұмыс істеп, 2019 жылы Мемлекеттік заң бөлімінің сектор меңгерушісі болып тағайындалды. 2019 - 2021 жылдары - Қазақстан Республикасы Мемлекеттік қызмет істері агенттігінің Алматы қаласы бойынша департамент басшысы болды.

2021 жылдың мамыр айынан бастап Бас әскери прокурордың бірінші орынбасары.

Сыныптық шені – әділет полковнигі.

«Құрмет» орденімен марапатталған (2015ж.).