Бас санитарлық дәрігер Ерлан Қиясовтың жаңа қаулысы жарияланды

Жүкті әйелдердің толғату уақыты таяғанда қолында ПТР әдісімен COVID-19 сынағының теріс нәтижесі бар сертификаты болса, нәтиже шыққан күннен бастап серіктестік босануды өткізуге рұқсат етіледі.

Сондай-ақ, Қазақстанға рейстермен, теміржол, теңіз, өзен көлігі және автомобиль өткелдеріндегі бақылау-өткізу пункттері арқылы келетін адамдарға қатысты іс-шаралар өткізу ережелері өзгертілді.

Атап айтқанда, Қазақстанның мемлекеттік шекарасынан өту кезінде келгендердің барлығы, бес жасқа толмаған балаларды қоспағанда, мемлекеттік шекараны кесіп өткен кезінде нәтиже шыққан күннен бастап 3 тәуліктен аспаған COVID-19 ПТР тестінің теріс нәтижесі бар анықтаманы ұсынуға міндетті.

Бұған дейін кейбір келушілерге, атап айтсақ; Қазақстан Республикасы Сыртқы істер министрлігінің шақыруымен келген шетелдік және халықаралық ұйымдардың ресми делегация мүшелері, дипломатиялық өкілдіктердің, консулдық мекемелердің және Қазақстанда тіркелген халықаралық ұйымдардың өкілдіктері мен қызметкерлері және олардың отбасы мүшелеріне ерекшеліктер берілетін. Ендігі жағдайда олар да теріс нәтижелі ПТР сертификатын ұсынуы керек.

ПТР анықтамасынсыз келген адамдар карантиндік ауруханаға үш күнге дейін COVID-19 зертханалық зерттеуге ПТР арқылы жіберіледі.

Регламент 2020 жылдың 8 желтоқсанында сағат 00: 00-ден бастап күшіне енеді.