Бас прокуратура Владислав Челахтың ісін қайта тексереді

Бас прокуратура 2012 жылы «Арқанкерген» шекара заставасында 15 адамды өлтіру ісі бойынша сотталған Владислав Челахтың өтінішін зерттеуге уәде берді.

– Арыз Бас прокуратураға жіберілді. Әрі қарай зерттейміз, өйткені өздеріңіз түсінесіздер, іс он жыл бұрын болған. Қажет болса, одан жауап алынады, – деді Бас прокурордың бірінші орынбасары Тимур Тәшімбаев.

Еске салайық, 2012 жылдың мамыр айында Алматы облысындағы «Арқанкерген» заставасында 14 шекарашы мен бір жергілікті аңшының өлі денесі табылған болатын. Бірнеше күннен кейін қанды қырғынды мойындаған соңғы, 15-ші «Арқанкерген» шекарашысы Владислав Челах ұсталды. Тергеу мәліметінше, Челах алдымен сарбаздарды атып, кейін казарманы өртеп жіберген.

Челах 2012 жылы желтоқсанда ауыр қылмыс жасады деп айыпталып, өмір бойына бас бостандығынан айрылды. Қазақстан әскери сотының апелляциялық және кассациялық алқалары бірінші инстанцияның үкімін өзгеріссіз қалдырды. Сотталушы Қазақстан президентіне кешірім жасауды өтінген. 2014 жылдың 4 ақпанында Қазақстан Республикасы Жоғарғы Сотының қадағалау алқасы да үкімді өзгеріссіз қалдырды.

2015 жылдың 2 ақпанында БҰҰ-ның Адам құқықтары жөніндегі комитеті Челахтың шағымын қарауға қабылдады. 2017 жылғы 7 қарашада шағым комитетте қаралып, қанағаттандырылды. Қазақстан Азаматтық және саяси құқықтар туралы халықаралық пактінің 14-бабын бұзып, сол арқылы Челахты әділ және бейтарап сот қарау құқығынан айырғаны танылды.