Бас прокуратура қаңтар оқиғасының қанша қатысушысына рақымшылық жасалатынын мәлімдеді

Консультативтік құжат Open NLA порталында жарияланды.

Қазақстанның Бас прокуратурасы қаңтардағы тәртіпсіздіктерге жүргізілген мониторингтің қорытындысы бар құжатты қоғамдық талқылауға шығарды. Осы мәліметтер бойынша 1520 адам рақымшылыққа ілінген.

Олардың ішінен:

• сотқа дейінгі тергеп-тексеру сатысында – 391 қылмыстық іс бойынша 383 күдікті;

• сот өндірісінде – 36 іс бойынша 102 күдікті;

• 1035 адам сотталды, олардың 93-і бас бостандығынан айыру орындарында жазасын өтеп жатыр, 930-ы пробациялық бақылауда, тоғыз сотталған қоғамдық жұмыстарда, тағы үшеуіне айыппұл салынды.

Бас прокуратура айыпталушыға рақымшылық жасаудың екі жолын ұсынады:

1) ауыр және ауыр емес қылмыстарды, сондай-ақ ауыр және аса ауыр қылмыстарды жасаған барлық тұлғалардың соттылығын алып тастау;

2) шағын және орташа ауырлықтағы қылмыстық құқық бұзушылықтар жасаған адамдарды қылмыстық жауаптылықтан толық босату, ауыр және аса ауыр қылмыс  жасаған адамдарды жазалау мерзiмiн қысқарту.

Бұл ретте құжатта:

«Заң жобасы мемлекетке опасыздықпен, жаппай тәртіпсіздіктерді ұйымдастырумен, сыбайлас жемқорлықпен, террористік, экстремистік қылмыстар, азаптаумен байланысты қылмыстар жасаған, сондай-ақ қылмыстардың қайталануы немесе қылмыстың қауіпті қайталануы тағайындалған жазаға қолданылмайды».

Еске салайық, Қасым-Жомарт Тоқаев таяудағы Қазақстан халқына Жолдауында Қанды қаңтарға қатысушыларға бір реттік рақымшылық жариялаған болатын. Ол рақымшылық тәртіпсіздіктерді ұйымдастыруға қатысы бар негізгі айыпталушыларға, сондай-ақ мемлекетке опасыздық жасады және билікті күшпен ауыстыруға әрекет жасады деп айыпталғандарға әсер етпейтінін атап өтті.

Қазақстан Республикасының Бас прокуратурасы рақымшылыққа ілінетін сотталған азаматтардың тізімін қыркүйек айының басында дайындап беруге уәде берді.