Бас прокуратура «Өзенмұнайгаз» АҚ тендерлерінің заңдылығын зерттемек

Маңғыстау облысына орталық аппараттың тәжірибелі қызметкерлерінен құрылған жұмыс тобы келді.

Мамандардан құралған жұмыс тобы АҚ тендерлерінің заңдылығы мен ашықтығын тексеріп, сонымен қатар Жаңаөзен қаласының және жалпы облыстың әлеуметтік-экономикалық жағдайына талдау жасамақ.

«Топтың алдында «Өзенмұнайгаз» АҚ-да тендерлерді өткізу кезінде заңдылықты сақтау және ашықтықты қамтамасыз ету мәселелерін зерделеу міндеті тұр», - деп хабарлады Бас прокуратураның баспасөз қызметі.

Мердігер ұйымдардың қызметкерлері осы мәселені жиі көтеріп, оны еңбек жағдайының нашарлауымен және жалақының төмендеуімен байланыстыратыны атап өтіледі. Сондықтан қадағалаушы агенттік қызметкерлері «Өзенмұнайгаз» АҚ-ның қаржылық-шаруашылық құжаттамасы мен сатып алуларын ықтимал бұзушылықтар мен сыбайлас жемқорлық тәуекелдеріне талдау жасауды жоспарлап отыр.

Бұл ретте топ Жаңаөзен қаласының, жалпы Маңғыстау облысының әлеуметтік-экономикалық дамуына талдау жасайды. Атап айтқанда, тұрғын үй және инженерлік инфрақұрылым салу, кәсіпкерлікті, мәдениетті, спортты, туризмді және агроөнеркәсіп кешенін дамыту, денсаулық сақтау жүйесін жетілдіру және өңір үшін маңызды басқа салалардағы мәселелерді қозғамақ.

Алдағы уақытта қосымша  нәтижелер жарияланады деп күтілуде.