Бас прокуратура: Күдебаевтың үнсіз келісімімен азаматтарды азаптап, ұрып-соққан

Қазақстанның Бас прокуратурасы экс-генерал Серік Күдебаевқа тағылған айыптың жай-жапсарын жариялады. Тергеу оның кінәсінен қала қорғансыз қалды деп есептейді. Сонымен қатар оның үнсіз келісімімен 23 азамат азапталғаны айтылды.

Кеше Алматы облыстық ПД-ның бұрынғы басшысы Серік Күдебаев қаңтар оқиғасы кезінде ауыр зардаптарға әкеп соқтырған қызметтік өкілеттігін асыра пайдаланды және азаптау бойынша кінәлі деп танылып, 10 жылға бас бостандығынан айыру жазасына кесілді.

Кейінірек Бас прокуратура тағылған айыптың егжей-тегжейлерін жариялауды ұйғарды. Ведомствоның хабарлауынша, экс-генерал Қазақстан Республикасы Конституциясы нормаларын, Мемлекет басшысының «Төтенше жағдай енгізу туралы» Жарлығын, «Құқық қорғау қызметі туралы» және «Ішкі істер органдары туралы» заңдарды бұзған», сондай-ақ ішкі ведомстволық бұйрықтар мен арнайы жоспарлар талаптарын орындамаған.

Шабуыл белгілері болмаған жағдайда да төтенше жағдай кезіндегі қоғамдық қауіпсіздікті қамтамасыз етудің орнына С.М.Күдебаев жеке құрамға ғимараттан шығып, үйлеріне қайтуға заңсыз бұйрық беріп, қызметкерлердің рухын түсірген. Аудан коменданты бола тұра, жедел штабтың дұрыс жұмыс істеуін және облыстағы жағдайды тұрақтандыру бойынша дер кезінде шаралар қабылдауды қамтамасыз етпеді. Соның салдарынан Талдықорған қаласы бейберекеттік пен тәртіпсіздіктерге тап болды. Бұзақылар сауда үйлері мен кәсіпкерлік нысандарын тонап кеткен. Олар банкоматтар мен супермаркеттердің кассаларын босатып, облыс әкімдігінің, «Нұр-Отан» партиясының ғимараттарына шабуыл жасап, өртеп жіберген.

Салдарынан Облыстық полиция департаменті мен Талдықорған қалалық полиция бөлімі ғимаратынан 500-ге жуық қару мен 28 мыңнан астам оқ-дәрі ұрланған, олардың біразы әлі табылған жоқ. Азаматтар мен мемлекетке келтірілген шығын шамамен 5 миллиард теңгеге бағаланды.

«2022 жылдың 7-16 қаңтары аралығында оның жасырын келісімімен 23 азамат Полиция департаментінің ғимаратында жаппай азапталған. Оның үстіне С.М.Күдебаевтың қарамағындағы қызметкерлері жеткізілген адамдарды бөлім аумағында ұрып-соққаны бейнекамералар арқылы жазылып қалған. Психикалық және физикалық зорлық-зомбылықпен, сондай-ақ үтік қолданып, тыйым салынған тергеу әдістері нәтижесінде аталған азаматтардың денсаулығына әртүрлі ауырлықта зиян келтірілді» деп толықтырды Бас прокуратура.

Бас прокуратура Күдебаевтың кінәсінің толық дәлелденгендігін баса айтты.

Еске салайық, Алматы облысының бұрынғы ДП басшысы 2022 жылдың қаңтар айының басында Талдықорғанда жаппай тәртіпсіздіктер орын алған кезде қаланы тастап кеткен болатын. Сосын ол үкім шығар алдында елден қашып кеткен.