Бас прокуратура БҰҰ-ның Мәсімовке қатысты мәлімдемесіне түсініктеме берді

Бас прокурордың орынбасары Әсет Шындалиев ҰҚК-нің бұрынғы басшысы Кәрім Мәсімовке қатысты БҰҰ-нан ресми хабарлама болмағанын айтты.

Бұған дейін БҰҰ-ның негізсіз тұтқындаулар жөніндегі жұмыс тобы Кәрім Мәсімовтің себепсіз ұсталғанын мәлімдеген.

«Біз Қазақстан үкіметін Кәрім Мәсімовті негізсіз ұстауға қатысты істерді тәуелсіз тергеушілер жүргізуін қамтамасыз етуге және оның құқықтарын бұзған жауаптыларға тиісті шара қолдануға шақырамыз» делінген хабарламада.

Әсет Шындалиев бұл хабарламаны желіден көргенін мойындады.

«Бірақ мен [БҰҰ] жұмысы бойынша мұндай ұсыныстарды әлі алған жоқпын. Өтініш ресми түрде Бас прокуратураға жолданған кезде сол бойынша жұмыс жүргізіліп, нәтижесінде шешім қабылданады» деп сендірді ол.

Еске салсақ, Мәсімов қаңтар оқиғасынан кейін мемлекетке опасыздық жасады деген күдікпен ұсталған болатын. Қаңтар айының соңында ҰҚК баспасөз қызметі Мәсімов пен оның орынбасарларының ісі құпия болып, сот оларды қамауға алуға санкция бергенін хабарлады. 10 наурызда департамент Мәсімовтен тәркіленген миллиондар, зәулім үйлер мен қымбат көліктер туралы айтты. ҰҚК экс-басшысының қамауға алу мерзімі бұған дейін жеті рет - 14 наурызда, 14 сәуірде, 11 мамырда, 6 маусымда, 19 шілдеде, 25 тамызда және 26 қазанда ұзартылды. Ол 17 жылға бас бостандығынан айрылуы мүмкін.